യുദ്ധത്തിന് വിരാമമിട്ട ക്ലിക്ക്

 

യുദ്ധത്തിന് വിരാമമിട്ട ക്ലിക്ക്

യുദ്ധമുഖത്തെ ചിത്രങ്ങള്‍ പലപ്പോഴും ലോകത്ത് ചര്‍ച്ചയായിട്ടുണ്ട്. വിവിധ രാജ്യങ്ങള്‍ തമ്മില്‍ നടക്കുന്ന യുദ്ധങ്ങള്‍ വിജയിക്കുന്ന രാജ്യത്തിന് പോലും സമാധാനം നല്‍കുന്നില്ല. യുദ്ധ കാലയളവില്‍ ആ രാജ്യങ്ങളിലെ സാധാരണ ജീവിതങ്ങള്‍ പുറംലോകത്ത് എത്തിക്കുന്നതില്‍ യുദ്ധ ചിത്രങ്ങള്‍ മുഖ്യപങ്കുവഹിക്കുന്നു.

ഇത്തരത്തില്‍ ചര്‍ച്ച ചെയ്യപ്പെട്ട ഒരു ചിത്രമായിരുന്നു വിയറ്റ്‌നാം യുദ്ധകാലത്ത് അസോസിയേറ്റ് പ്രസ്സിന്റെ വിയറ്റ്‌നാമീസ് അമേരിക്കന്‍ ഫോട്ടോഗ്രാഫര്‍ നിക്ക് ഉട്ടിന്റെ 'യുദ്ധത്തിന്റെ ഭീതി' എന്ന ചിത്രം. 1972 ജൂണ്‍ 8ന് വിയറ്റ്‌നാം വായുസേനയുടെ അശ്രദ്ധമൂലം അഗ്നിഗോളമായി തീര്‍ന്ന ട്രാങ് ബാങില്‍ നിന്നെടുത്ത ഫോട്ടോ ആയിരുന്നു അത്. വിയറ്റ്‌നാമിലെ സൈഗോണില്‍ നിന്നും 25മൈല്‍ വടക്കുപടിഞ്ഞാറു മാറി സ്ഥിതി ചെയ്യുന്ന ഈ ഗ്രാമത്തില്‍ വായുസേന അബദ്ധത്തില്‍ ഒരു ലോഡ് നപാം(ബോംബ് നിര്‍മ്മാണത്തിനുപയോഗിക്കുന്ന ഒരു രാസ പദാര്‍ത്ഥം)വര്‍ഷിക്കുകയായിരുന്നു. ഹൈവേയിലൂടെ കരഞ്ഞുകൊണ്ട് തന്റെ നേരെ ഓടിയടുക്കുന്ന ഒരുകൂട്ടം കുട്ടികളും സൈനികരും, കൂട്ടത്തില്‍ ആര്‍ത്തു കരഞ്ഞുകൊണ്ട് വിവസ്ത്രയായി ഒരു പെണ്‍കുട്ടിയും, അതായിരുന്നു നിക്ക് ഉട്ട് അവിടെ നിന്നും ഒപ്പിയെടുത്ത ചിത്രം.

ഫാന്‍ തി കിം ഫുക് എന്ന ഒമ്പതുവയസ്സുകാരി ആയിരുന്നു ആ പെണ്‍കുട്ടി. സ്‌ഫോടനത്തില്‍ വസ്ത്രങ്ങള്‍ കത്തി 30 ശതമാനം പൊള്ളലേറ്റ അവള്‍ ഏറെ നാളത്തെ ചികിത്സക്ക് ശേഷമാണ് സാധാരണ ജീവിതത്തിലേക്ക് തിരിച്ചെത്തിയത്. ഫോട്ടോ എടുത്ത ഉടന്‍ നിക്ക് ഉട്ട് അവളെ ആശുപത്രിയില്‍ എത്തിച്ചതിനാല്‍ അവളുടെ ജീവന്‍ രക്ഷിക്കാനായി.

1955 മുതല്‍ 1975 വരെ 20 വര്‍ഷകാലം തുടര്‍ന്ന അമേരിക്കയും വിയറ്റ്‌നാമും തമ്മിലുള്ള  യുദ്ധത്തിന്റെ യഥാര്‍ത്ഥ മുഖമാണ് ചിത്രം കാണിച്ചു തന്നത്. ഈ ചിത്രം ലോകത്ത് വലിയ ചര്‍ച്ചയ്ക്ക് കാരണമായി. യുദ്ധത്തിന്റെ ഭവിഷ്യത്തുകള്‍ ലോകരാഷ്ട്രങ്ങളുടെ ശ്രദ്ധയില്‍ കൊണ്ടുവരാന്‍ ചിത്രത്തിനായി.

 

അതേസമയം തന്നെ ചിത്രം വിവാദത്തിനും വഴിയൊരുക്കി. നഗ്നത  പ്രദര്‍ശിപ്പിക്കുന്ന ഒരു ചിത്രം പ്രചരിക്കുന്നതായിരുന്നു കാരണം. അസോസിയേറ്റഡ് പ്രസ്സ് പോലും ചിത്രം പ്രസിദ്ധീകരിക്കുന്നതില്‍ വിമുഖത കാണിച്ചു. പിന്നീട് ചിത്രത്തിന്റെ വാര്‍ത്താ മൂല്യം കണക്കിലെടുത്തു കൊണ്ട് കിം ഫുകിന്റെ തനിച്ചുള്ള ക്ലോസ് അപ്പ് ചിത്രം പങ്കുവെക്കരുതെന്ന ഉപാധിയോടെ ചിത്രം പ്രസിദ്ധീകരിച്ചു. ന്യൂയോര്‍ക്ക് ടൈംസ് അടക്കം പല പ്രസിദ്ധീകരണങ്ങളും തങ്ങളുടെ നയങ്ങളെ തള്ളിക്കളഞ്ഞു കൊണ്ട് ആ ചിത്രം പ്രസിദ്ധീകരിച്ചു.

1973ലെ പ്രമുഖ ഫോട്ടോഗ്രഫി അവാര്‍ഡുകളെല്ലാം ചിത്രത്തിനായിരുന്നു. വേള്‍ഡ് പ്രസ്സ് ഫോട്ടോ അവാര്‍ഡ്, പുലിറ്റ്‌സര്‍ പ്രൈസ്, ജോര്‍ജ് പോള്‍ക് അനുസ്മരണ അവാര്‍ഡ്, ഓവര്‍സീസ് പ്രസ്സ് ക്ലബ് അവാര്‍ഡ് എന്നിവ ഈ ചിത്രത്തെ തേടിയെത്തി. ഇതേവര്‍ഷം തന്നെ അമേരിക്ക വിയറ്റ്‌നാം യുദ്ധത്തില്‍ നിന്നും പിന്മാറുകയും ചെയ്തു.

16-ാം വയസ്സില്‍ തന്നെ ഫോട്ടോഗ്രഫി മേഖലയിലെത്തിയ നിക്കിന്റെ ഔദ്യോഗിക ജീവിതത്തിലെ വഴിതിരിവായിരുന്നു 'യുദ്ധത്തിന്റെ ഭീതി'. ടോക്കിയോ, സൗത്ത് കൊറിയ, ഹനോയ് എന്നിവിടങ്ങളില്‍ നിക്ക് അസ്സോസിയേറ്റ് പ്രസ്സിനായി ജോലി ചെയ്തു.

നിക്കിന്റെ മൂത്ത സഹോദരന്‍, അസ്സോസിയേറ്റ് പ്രസ്സിന്റെ ഫോട്ടോഗ്രാഫറായിരുന്ന ഹ്യൂന്‍  താന്‍ മി വിയറ്റ്‌നാം യുദ്ധ കാലത്ത് ജോലിക്കിടയില്‍ കൊല്ലപ്പെട്ടിരുന്നു. സഹോദരന്റെ പാത പിന്തുടര്‍ന്നാണ് നിക്ക് എ.പിയിലെത്തിയത്. നിക്കിനും യുദ്ധകാലത്ത് പലതവണ പരിക്ക് പറ്റിയിരുന്നു. ഇപ്പോള്‍ അമേരിക്കയില്‍ വിശ്രമ ജീവിതം നയിക്കുന്ന നിക്ക്, കിം ഫുകുമായി നല്ല സൗഹൃദ ബന്ധം തുടര്‍ന്നു വരുന്നു. നപാം പെണ്‍കുട്ടി എന്നറിയപ്പെടുന്ന കിം ഫുക് ഇന്ന് ഒരു എഴുത്തുകാരിയും യുനെസ്‌കോയുടെ ഗുഡ്‌വില്‍ അംബാസിഡറും കൂടിയാണ്.