ഡിജിറ്റല് ക്യാമറ വിപണിയില് വിപ്ലവം സൃഷ്ടിക്കുന്ന മിറര്ലെസ്സ് ക്യാമറകളിന്ന് വലിപ്പക്കുറവ് കൊണ്ടും മികച്ച പ്രവര്ത്തന രീതി കൊണ്ടും ക്യാമറ സ്നേഹികളുടെ ശ്രദ്ധയാകര്ഷിക്കുന്നു. സോണി, പാനസോണിക്, നിക്കോണ്, കാനോണ്, എന്നീ പ്രമുഖ ബ്രാന്ഡുകളാണ് വിപണിയില് മിറര്ലെസ്സ് ക്യാമറകള് എത്തിക്കുന്നത്.
സാധാരണയായി ഒരു പെന്റാപ്രിസം ഉള്പ്പെടുന്ന മെക്കാനിക്കല് മിറര് സംവിധാനത്തില് പ്രവര്ത്തിക്കുന്ന ക്യാമറകളാണ് എസ്.എല്.ആറുകള്. ഡിജിറ്റല് സാങ്കേതിക വിദ്യയുടെ വരവോടെ ഫിലിമുകള് ഉപയോഗിച്ച് ചിത്രങ്ങള് പകര്ത്തിയിരുന്ന ക്യാമറകള് പിന്നീട് ഡിജിറ്റല് സിംഗിള് ലെന്സ് റിഫ്ലക്സ് ക്യാമറ എന്ന ഡി.എസ്.എല്.ആറായി മാറി. ലെന്സില് പതിയുന്ന ദൃശ്യങ്ങള് ആദ്യം വ്യൂഫൈന്ഡറിലേക്കും പിന്നീട് സെന്സറിലേക്കും നല്കാന് സഹായകമാവുന്ന പെന്റാപ്രിസവും സെമി ട്രാന്സ്പരെന്റ് മിററും അടങ്ങിയതാണ് ഇത്തരം ക്യാമറകള്, എന്നാല് ഇത്തരം ക്യാമറകളില് നിന്നും വ്യത്യസ്തമായി പെന്റാപ്രിസവും ഉയര്ന്നു മാറുന്ന മിററും ഇല്ലാത്ത ക്യാമറകളാണ് മിറര്ലെസ്സ് ക്യാമറകള്. ഡി. എസ്. എല്. ആര് ക്യാമറകളുമായി താരതമ്യം ചെയ്യുമ്പോള് ഭാരക്കുറവ് മിറര്ലെസ് ക്യാമറയുടെ ഒരു പ്രധാന പ്രത്യേകതയാണ്. ഏറെ നീണ്ട ഫോട്ടോ സെഷനുകള്ക്കിടയില് കൈത്തണ്ടക്ക് വലിയ സമ്മര്ദ്ദം നല്കാതെ ഫോട്ടോകളെടുക്കാന് കഴിയുന്നത് മിറര്ലെസ്സ് ക്യാമറയെ പ്രൊഫഷണല് ഫോട്ടോഗ്രാഫര്മാര്ക്ക് അനുയോജ്യമായ ക്യാമറയാക്കി മാറ്റുന്നു.
ഒപ്റ്റിക്കല് വ്യൂഫൈന്ഡറിനു പകരം ഇലക്ട്രോണിക് വ്യൂഫൈന്ഡറുകള് ഉപയോഗിക്കുന്നതിനാല്, വേഗത്തില് ബാറ്ററികള് നഷ്ടമാവുന്നത് ഈ കാമറയുടെ ഒരു പോരായ്മയാണ്. എന്നാല് മെക്കാനിക്കല് മിറര് സംവിധാനം ഇല്ലാത്തതിനാലും ഉള്വശത്ത് ചലിക്കുന്ന ഭാഗങ്ങള് കുറവായതിനാലും താരതമ്യേന നിശബ്ദ പ്രവര്ത്തനവും ഉയര്ന്ന പ്രവര്ത്തന കാലയളവും മികച്ച ഇമേജ് സ്റ്റെബിലൈസേഷനും മിററര്ലെസ്സ് ക്യാമറയുടെ ഗുണങ്ങളാണ്. ഡി. എസ്. എല്. ആറുകള് പ്രധാനമായും നിശ്ചല ഛായാഗ്രഹണം മുന്നില് കണ്ടുകൊണ്ട് നിര്മ്മിക്കപ്പെട്ടവയാണെങ്കില് പോലും മിറര്ലെസ് ക്യാമറകള് മെച്ചപ്പെട്ട വീഡിയോ നിര്മ്മാണം കൂടി സാധ്യമാകുന്ന രീതിയിലുള്ള ഇലക്ട്രോണിക് സംവിധാനങ്ങളോടെയാണ് വിപണിയിലെത്തുന്നത്. 4 കെ വീഡിയോ, യൂട്യൂബ് ലൈവ് സംവിധാനം, സിനിമാറ്റിക് പോസ്റ്റ് പ്രൊഡക്ഷനുകളില് ഉപയോഗിക്കുന്ന 4 :4:4 ക്രോമ സാമ്പിള് ഔട്പുട്ട് എന്നിവ ഉള്പ്പെടുന്ന ഇന്നത്തെ മിറര്ലെസ്സ് ക്യാമറകള് തീര്ത്തും വീഡിയോ സൗഹൃദ ക്യാമറകളാണ്.
മിറര്ലെസ്സ് ക്യാമറയിലുപയോഗിക്കാന് കഴിയുന്ന ലെന്സുകളുടെ അഭാവമാണ് ഇന്ന് നേരിടുന്ന പ്രധാന പ്രശ്നം എന്നാല് മറ്റു ലെന്സുകള് ഘടിപ്പിക്കാന് സഹായകമാവുന്ന ലെന്സ് മൗണ്ട് അഡാപ്റ്ററുകള് വിപണിയിലെത്തുന്നത് കൂടുതല് പ്രൊഫഷണല് ഫോട്ടോഗ്രാഫര്മാരെ മിറര്ലെസ്സിലേക്ക് ആകര്ഷിക്കും. സോണിയുടെ ആല്ഫാ ശ്രേണിയിലെ ഫുള്ഫ്രെയിം മിറര്ലെസ്സ് ക്യാമറകളുമായി മത്സരിക്കാന് നിക്കോണും കാനോണും രംഗത്തെത്തിയതോടെ വിപണിയെ മുമ്പെങ്ങുമില്ലാത്ത വിധത്തില് ഫുള് ഫ്രെയിം മിറര്ലെസ്സ് ക്യാമറകള്കൊണ്ട് സജീവമാക്കും എന്നത് തീര്ച്ച.
Comments
Post a Comment