ബ്ലാക്ക് & വൈറ്റ് ഫ്രെയിമില്‍ രചിച്ച എകാന്ത കവിതകള്‍

 ''Black and white creates a stranger dreamscape that colour never can'' ജാക്ക് വാന്റൊഫിന്റെ ഈ വാക്കുകള്‍ കണ്ണിലുടക്കുന്നതും, കടമെടുക്കുന്നതും അമേരിക്കന്‍ ഫോട്ടോഗ്രാഫര്‍ ഫ്രാന്‍സെസ്‌കാ വുഡ്മാന്റെ ജീവിതത്തിന്റെ ആമുഖമാക്കാനാണ്. കറുപ്പിലും വെളുപ്പിലും വെളിച്ചം വിന്യസിപ്പിച്ചു സ്ത്രീ ശരീരത്തെ പാത്രമാക്കി അവര്‍ തീര്‍ത്ത ലോകങ്ങളെല്ലാം എല്ലാ മുന്‍ ധാരണകളെയും യുക്തിയെയും കൈവെടിഞ്ഞു ഉപബോധതലത്തെ ചിത്രീകരിക്കാന്‍ ഉദ്ദേശിച്ചിട്ടുള്ളവയായിരുന്നു. പതിമൂന്ന് വയസ്സുമുതല്‍ 22-ാം വയസ്സുവരെ നീണ്ടുനിന്ന ഫോട്ടോഗ്രാഫി ജീവിതം. ഇക്കാലയളവില്‍ പകര്‍ത്തിയ എണ്ണൂറോളം വരുന്ന ചിത്രങ്ങള്‍. 22-ാം വയസ്സില്‍ ആത്മഹത്യ! മാതാപിതാക്കള്‍ ഇന്നും സൂക്ഷിക്കുന്ന പത്തായിരത്തോളം വരുന്ന നെഗറ്റിവുകള്‍. ഒരര്‍ത്ഥത്തില്‍ ദൃശ്യങ്ങളില്‍ അവര്‍ തീര്‍ത്ത ലോകത്തെ തന്നെ കുറിക്കുന്നതായ ജീവിതം !

കോളറാഡോയിലെ ഒരു കലാകുടുംബത്തില്‍ തന്നെയായിരുന്നു ഫ്രാന്‍സസ്‌കയുടെ ജനനം; ചിത്രകാരനും ഫോട്ടോഗ്രാഫറുമായ പിതാവിനും, ശില്പിയായ മാതാവിന്റെയും മകളായി 1958 ഏപ്രില്‍ 3ന്. അകാലപക്വമായ വിടവാങ്ങലിന് മുന്‍പായി തന്നെ ആഴത്തില്‍ പഠനം ആവശ്യപ്പെടുന്നതും, തലമുറകള്‍ ശ്രദ്ധാകേന്ദ്രമാക്കേണ്ടതുമായ ചിത്രങ്ങള്‍ അവര്‍ ക്യാമറയില്‍ പകര്‍ത്തിയിരുന്നു. കലയെ നിത്യജീവിതത്തില്‍ സംസാരവിഷയമാക്കുന്ന കുടുംബ അന്തരീക്ഷം ഫ്രാന്‍സെസ്‌കക്ക് ലഭിച്ചിരുന്നു. ആര്‍ട്ട് സ്‌കൂളിലെ പഠനവും ഗവേഷണവുമെല്ലാം അവരെ കൃത്യമായി സ്വാധീനിച്ചിട്ടുണ്ട്. ഫ്രാന്‍സെസ്‌ക എന്ന ഫോട്ടോഗ്രഫര്‍ എഴുതപ്പെടുമ്പോഴെല്ലാം ആവര്‍ത്തിക്കുന്ന ചോദ്യം അവരുടെ ചിത്രങ്ങളില്‍ പ്രായത്തില്‍ കവിഞ്ഞു കാണപ്പെടുന്ന സങ്കീര്‍ണതകളെ സംബന്ധിച്ചിട്ടുള്ളതാണ്. യൗവ്വനത്തെയും, ആ കാലഘട്ടത്തിലെ ചിന്താധാരകളെയും പ്രതിപാതിച്ചിട്ടുള്ളവയായിരുന്നു അവരുടെ ഫോട്ടോഗ്രഫുകള്‍. സ്ഥലകാലങ്ങള്‍ ചിത്രങ്ങളില്‍ നിശ്ചലമാണെന്ന 'വസ്തുതയെ' അവര്‍ നിരന്തരം ചിത്രങ്ങളിലൂടെ തന്നെ വെല്ലുവിളിച്ചുകൊണ്ടിരുന്നു. നഗ്നയായും അര്‍ദ്ധ നഗ്നയായുമെല്ലാം അവര്‍ തന്നെ ചിത്രങ്ങളില്‍ പ്രത്യക്ഷപ്പെടുന്നുണ്ട്. കുറഞ്ഞ ഷട്ടര്‍ സ്പീഡിലൂടെ നിര്‍മ്മിച്ചെടുക്കുന്ന ബ്ലറിങ് എഫക്ട് പൊതുവായി അവര്‍ ഉപയോഗിച്ചിരുന്നു. സ്ത്രീശരീരങ്ങള്‍, കണ്ണാടിയും, വാതിലും, കസേരയുമടക്കമുള്ള ഗൃഹോപരണങ്ങളും ഫോട്ടോഗ്രഫി ഒബ്‌ജെക്റ്റുകളായി ചിത്രങ്ങളില്‍ പ്രത്യക്ഷപ്പെടുന്നു. 1977-78 കാലഘട്ടത്തിലാണ് മാലാഖകളെ പ്രതിപാത്യ വിഷയമാക്കി കൊണ്ടുള്ള അവരുടെ ഫോട്ടോ സീരീസ് പുറത്തു വരുന്നത്.

യൗവ്വന കാലത്ത് ചിന്താധാരകളിലുള്‍പ്പെടുന്ന ഏകാന്തതയും, ഒറ്റപ്പെടലും, മനുഷ്യബന്ധങ്ങളും, ലൈംഗീകതയും, വ്യക്തിത്വ ബോധവും, ജീവിതത്തിലെ അനിശ്ചിതത്വവുമെല്ലാം തന്നെ അവരുടെ ചിത്രങ്ങളില്‍ ആവിഷ്‌കരിക്കപ്പെടുണ്ട്. പകര്‍ത്തിയ ചിത്രങ്ങള്‍ക്ക് പിന്നിലെ ചിന്തകളില്‍ തന്നെ ആത്മകഥാംശങ്ങള്‍ കണ്ടെടുക്കാനാവും. തകര്‍ന്നു പോയ പ്രണയ ബന്ധവും, കലയിലെ അനിശ്ചിതത്വവുമാണ് ആത്മഹത്യയിലേക്ക് നയിക്കും വിധം ഫ്രാന്‍സസ്‌കയെ വിഷാദത്തിലാഴ്ത്തിയത്. പൂര്‍വ്വ കാമുകന് ചെറുകുറിപ്പുകള്‍ ചേര്‍ത്ത് അവര്‍ അയച്ചുകൊടുത്ത ഫോട്ടോഗ്രാഫുകള്‍ ഓണ്‍ലൈനായി തന്നെ നിലവില്‍ കാഴ്ചക്ക് ലഭ്യമാണ്.

യാഥാര്‍ഥ്യത്തെ അഭിസംബോധന ചെയ്യുന്നവയാണ് പൊതുവെ ഫോട്ടോഗ്രാഫുകള്‍ എന്നിരിക്കെയാണ് ഫ്രാന്‍സസ്‌കയുടെ നിശ്ചലച്ചിത്രങ്ങള്‍ വ്യത്യസ്തമാവുന്നത്. യാഥാര്‍ഥ്യത്തിന് പകരം അവര്‍ ചിത്രീകരിച്ചത് അവരുടെ തന്നെ ചിന്തകളെയാണ്. ലൊക്കേഷന്‍, ലൈറ്റിങ്, ഒബ്‌ജെറ്റ്‌സ് കൂടാതെ സ്വന്തം ശരീരം തന്നെയും സങ്കല്‍പ്പലോകത്തിനെ യാഥാര്‍ഥ്യമായി അവതരിപ്പിക്കാന്‍ ഉപയോഗിക്കുന്നു. എഴുപതുകളില്‍ ചിത്രീകരിച്ച ചിത്രങ്ങള്‍ എന്നാല്‍ ആ കാലഘട്ടത്തില്‍ മാത്രമായി അകപ്പെട്ടു കിടക്കുന്നവയല്ല. വസ്ത്രധാരണത്തില്‍ ഉള്‍പ്പെടെ കാലത്തെ കൃത്യമായി നിര്‍ണ്ണയിക്കാന്‍ ആകാത്ത വിധം ആക്കിത്തീര്‍ക്കാന്‍ ശ്രദ്ധിച്ചിട്ടുണ്ട്.

പതിമൂന്നാം വയസ്സില്‍ തുടങ്ങി 8 വര്‍ഷം മാത്രം നീണ്ടു നിന്ന ഫ്രാന്‍സെസ്‌ക വുഡ്മാന്‍ എന്ന ഫോട്ടോഗ്രാഫറുടെ ഫോട്ടോഗ്രാഫി ജീവിതം ഇന്നും ചര്‍ച്ചക്ക് വിഷയമായിക്കൊണ്ടിരിക്കുന്നു. അവരുടെ തന്നെ ചിത്രങ്ങളുടെ പ്രദര്‍ശനങ്ങള്‍ പ്രധാനമായും നടന്നത് മരണശേഷമാണ്. ഫ്രാന്‍സെസ്‌കയുടെ ജീവിതത്തെ അവലംബിച്ചു 'The Woodmans' എന്ന ഡോക്യൂമെന്ററി പുറത്തുവരുന്നത് 2011ലും. ആത്മഹത്യയിലൂടെ സ്വന്തം ജീവിതം അവസാനിപ്പിക്കാന്‍ അവര്‍ തയ്യാറാകും മുന്‍പേ തന്നെ തന്റെ ചിത്രങ്ങളിലൂടെ അക്ഷയമാവാന്‍ അവര്‍ക്ക് സാധിച്ചിരുന്നു. അത് പക്ഷേ നിശ്ചലമായ ഒരു ഫോട്ടോഗ്രഫി ഫ്രെയിമില്‍ അകപ്പെട്ടുപോയതു കൊണ്ടായിരുന്നില്ല. മറിച്ച് തന്റെ മനോവ്യാപാരങ്ങളും, ഏകാന്തതയും വരച്ചിട്ട ബ്ലാക്ക് ആന്‍ഡ് വൈറ്റ് ഫ്രെയ്മിനുള്ളില്‍ പറഞ്ഞ കവിതകളിലൂടെ!