ഫോട്ടോകള് നൈമിഷികമാണ്. അതിന് പല തരത്തിലുള്ള അര്ത്ഥങ്ങളും അര്ത്ഥതലങ്ങളും ഉണ്ടായിരിക്കും. ഏതൊരു ഫോട്ടോയ്ക്കും പലതരം കഥകള് പങ്കുവെക്കുവാനുണ്ടാകും. ന്യൂസ് ഫോട്ടോഗ്രഫി മറ്റു ഫോട്ടോഗ്രഫികളില് നിന്നും തികച്ചും വ്യത്യസ്ഥമാണ്. കഠിനാധ്വാനവും ഭാഗ്യവും ഒരു പോലെ ആവശ്യമുള്ള മേഖലയാണ് ന്യൂസ് ഫോട്ടോഗ്രഫി. ഒരു സംഭവത്തെ അതിന്റെ ആധികാരികതയോടും സത്യസന്ധതയോടും കൂടി പകര്ത്തുക എന്നതാണ് ഒരു ന്യൂസ് ഫോട്ടോഗ്രാഫറുടെ കടമ.
19ാം നൂറ്റാണ്ടിന്റെ മധ്യത്തിലാണ് മാധ്യമങ്ങള് വാര്ത്തകളോടൊപ്പം ചിത്രങ്ങളും പ്രസിദ്ധീകരിക്കാന് ആരംഭിച്ചത്. ചിത്രങ്ങള്ക്ക് ഏതൊരു വിഷയത്തിന്റെയും ആധികാരികത വര്ദ്ധിപ്പിക്കാന് സാധിക്കും. വാര്ത്തകളുടെ കൂടെചിത്രങ്ങള് ഉള്ക്കൊള്ളുമ്പോഴാണ് ആ വാര്ത്തക്ക് പൂര്ണ്ണത കൈവരുന്നത്.
ന്യൂസ് ഫോട്ടോഗ്രഫിയെ ഒരിക്കലും ഒറ്റ വാക്കില് നിര്വചിക്കാന് സാധിക്കില്ല. ചിത്രങ്ങള്ക്ക് കഥകള് പങ്കുവെയ്ക്കുവാനുള്ള കഴിവ് കൂടുതലാണ്. ന്യൂസ് ഫോട്ടോഗ്രഫിയും അത്തരത്തിലൊന്നാണ്. പത്രങ്ങളിലെ ചിത്രങ്ങള് മാത്രം വായിക്കുന്നവരുണ്ടാവാം, അവരെ സംബന്ധിച്ചിടത്തോളം വാര്ത്തകളേക്കാള് പ്രാധാന്യം അതിലുള്ള ചിത്രങ്ങള്ക്കാണ്. പത്രമാധ്യമങ്ങളിലൂടെ പ്രശസ്തമായ ഒരുപാട് ചിത്രങ്ങളുണ്ട്.
അത്തരത്തിലുള്ള ഒരു ചിത്രമാണ് 2019 ല് കേരളത്തിലെ പ്രളയചിത്രങ്ങള്ക്കൊപ്പം വാര്ത്താപ്രാധാന്യം നേടിയ വറ്റിവരണ്ടു കിടക്കുന്ന ഇടുക്കി അണക്കെട്ട് വെള്ളം നിറക്കുന്നതിന് മുമ്പ് മലയാളമനോരമയിലെ ഫോട്ടോഗ്രാഫറായ എം.ടി സേവ്യര് പകര്ത്തിയത്. 1974 മാര്ച്ച് 17 നാണ് മലയാളമനോരമ ഈ ചിത്രം ആദ്യമായി പ്രസിദ്ധീകരിച്ചത്. പിന്നീട് പ്രളയ സമയത്ത് നിറഞ്ഞൊഴുകുന്ന ഇടുക്കി ഡാമിന്റെ ചിത്രത്തോടൊപ്പം താരതമ്യപ്പെടുത്തിയാണ് വര്ഷങ്ങള് പഴക്കമുള്ള ഈ ചിത്രം വീണ്ടും പത്രമാധ്യമങ്ങളില് നിറഞ്ഞ് നിന്നത്.
പത്രങ്ങളിലൂടെ അന്താരാഷ്ട്ര ജനശ്രദ്ധയാകര്ഷിച്ച ഒരു ചിത്രമാണ് മക് അലന് ടെക്സസിലെ യു.എസ് മെക്സിക്കോ അതിര്ത്തിയില് നിന്നും 2018 ജൂണ് 12 ന് ജോണ് മൂറെ പകര്ത്തിയ ചിത്രം. തടവിലായ തന്റെ അമ്മയെ തിരയുന്ന രണ്ടു വയസുകാരി. മെക്സിക്കോയില് നിന്നും റിയോഗ്രാന്റ് നദി മുറിച്ച് കടക്കുന്ന അഭയാര്ത്ഥികളെ പട്ടാളക്കാര് തടവിലാക്കിപ്പോള് ഒറ്റപ്പെട്ടുപോയതാണ് ഈ പെണ്കുട്ടി. പൊട്ടിക്കരഞ്ഞുകൊണ്ടു നില്ക്കുന്ന ഈ കുട്ടിയുടെ ചിത്രം ഒരുപാട് ജനശ്രദ്ധയാകര്ഷിച്ച ഒന്നാണ്. അമേരിക്കന് പ്രസിഡന്റ് ഡൊണാള്ഡ് ട്രംമ്പിന്റെ 'സീറോ ടോളറന്സ്' പദ്ധതിയുടെ ഭാഗമായി കുടിയേറിപ്പാര്ക്കുന്ന അഭയാര്ത്ഥികളെ തടവിലാക്കുക എന്ന നയത്തിന്റെ ബാക്കിപത്രമാണ് ഈ ചിത്രം.
അന്താരാഷ്ട്ര തലത്തില് ഒരുപോലെ ജനശ്രദ്ധയാകര്ഷിച്ച സാമ്യതയുള്ള ചിത്രങ്ങളാണ് ഹിബ നസീറിന്റെയും ഹാദി ഹുദയുടെയും. കാശ്മീരിലെ പെല്ലറ്റാക്രമണത്തിന് ശേഷം ചികിത്സ കഴിഞ്ഞ് വീട്ടിലെത്തിയ ഹിബ തന്റെ സഹോദരന് അവള്ക്ക് നേരെ ഉയര്ത്തിയ ക്യാമറ തോക്കാണെന്ന് തെറ്റിദ്ധരിച്ച് അവനെ ദയനീയതയോടെ നോക്കുന്നു. ഹാദി ഹുദയാവട്ടെ തന്റെ നേര്ക്ക് ഫോട്ടോഗ്രാഫര് നീട്ടിയത് ക്യാമറയല്ല മറിച്ച് തോക്കാണെന്ന് മനസ്സിലാവാതെ ദയനീയതയോടെ രണ്ടു കയ്യും ഉയര്ത്തിപ്പിടിച്ച് നില്ക്കുന്നു. ഹിബയുടെ ഫോട്ടോ പകര്ത്തിയത് ഫ്രീലാന്സ് ഫോട്ടോഗ്രാഫര് ഒമ്രാന് യൂസഫും ഹാദി ഹുദയുടെ ഫോട്ടോ പകര്ത്തിയത് ടര്ക്കിഷ് പത്രത്തിലെ സീനിയര് ഫോട്ടോഗ്രാഫര് സാഗര്ലിയുമാണ്.
ചുരുക്കത്തില് മാധ്യമപ്രവര്ത്തനത്തില് അതേ പ്രാധാന്യമാണ് ഫോട്ടോകള്ക്കും ഉള്ളത്. ചിലപ്പോള് വാര്ത്തകളേക്കാളേറെ!! കാരണം ഒരു ചിത്രം ആയിരം വാക്കുകള്ക്ക് തുല്യമാണ്.
Comments
Post a Comment